近十年八載，人人都說西環變了樣，全因為港鐵來了。但戴毅龍斬釘截鐵說：不是。

 

「呢種變化唔係喺呢個區發生緊，係喺每一區發生緊，咁就唔係因為地鐵喇。」

 

46歲的阿龍是西環石塘咀多年街坊，也是facebook群組「西環變幻時」的創版版主，在社交媒體冒起不久的2009年便開網上地區群組，今日看來是早著先機，但當年卻是因為他有「大Q鑊」的預感，有建立社交群組的需要。早在港鐵來臨之前的2008、09年，政府已放風有意放寬50年樓齡舊樓強制拍賣門檻，由九成降至八成。「唔好玩啦！」整個西環，由西營盤、石塘咀到堅尼地城，舊樓處處都是，阿龍知道修例一過，收購重建肯定令這裏變天，尤其是一直穩住社區面貌的舊樓地舖、尋常老店，但他根本不知如何對抗。「利東街你知個目標係市建局，但你郁強拍門檻，我搵邊個好呢？」

 

他當時能想到的，就是連結區內街坊，於是乘著社交網絡之勢開展群組，聚集同樣「鍾意呢個社區」的人。起初他不停分享社區風景照，吸引街坊加入，又辦過地區導賞團，讓他們更了解社區的歷史，聚集了理念相近的人後，大家一同討論社區議題，之後又吸引更多人加入互動……時至今天，群組已累積9萬成員。阿龍說，這裏當然有意見不同的人，尤其在社會多事之秋。「（群組）令我deal with好多我無想像過嘅人……有啲人諗法同你好唔同喎，咁你點同佢哋傾？（有些人）最後大家明白有啲立場唔同，但有啲大家都認同嘅方向，咁OK啦。This is what democracy looks like。」

 

這個群組除了討論社區議題，同時也塑造了社區一片另類土壤，編織成一個支援網絡，有社區組織在裏頭找到合作的人，也孕育過不同的好人好事發生。阿龍說曾經有老麵店「嗌救命」，假期前夕，牛丸打到一半，機器忽然壞了，群組一聲號召，便有師傅應聲來修理。又有一次在海旁果欄，有幼貓被困超大型雪櫃後面，群組的街坊、貓義工來協助仍不果，最終勞動到消防坍塌拯救隊來鑿牆開洞救援！此外還有難以數算的尋失貓失狗事件……犀利嗎？基本啦！阿龍說：「有一定人數就做到㗎喇！」

 

在西環長大的阿龍，公餘時間花在經營社區之中，如今變成湊女爸爸，遇上疫情的確是忙得不可交加，但他對於群組的未來仍然滿腦子想法，一邊適應社交平台的變化，一邊仍希望在群組討論社區教育。「呢一年係有啲有心無力嘅，細路無得返學我係好大鑊，本來有嘅時間無埋！」

 

至於強拍這議題，群組開了12年，有改變到什麼了嗎？阿龍坦承：「完全唔知做到乜。」強拍修例無懸念，社區逐漸變臉，那七彩牆身的西環大樓、吃了廿年那個舖位那碗魚蛋粉、轉角那間由細望到大的錶舖，都沒有了。但到了此刻，至少還有一班互相緊扣的「西環人」。

​

​

後記

 

跟阿龍在石塘咀走了一小圈，經過港鐵香港大學站，問他：「其實你情願有港鐵定無港鐵？」

「有呀！好清楚呀呢個！」

「你有一個平價嘅公共運輸交通工具，令到基層勞動者佢哋可以唔使塞車地返到工，佢生活係一定改善咗㗎！係咪？但我唔鍾意高鐵。高鐵貴，剩係啲社會精英先至用到囉，因係佔用咗好多基層勞動者嘅資源囉，其實就係咁簡單。」

「地鐵梗係好啦，以前無地鐵？出中環返工，真係Ｘ街㗎塞到，係喊嗰隻㗎。我試過出中環，上咗車塞住喺條橋度一個鐘頭呀，大佬！」